ⵜⵙⵏⴱⴳⵉ ⵎⴰⵙⵙⴰ ⵣⵉⵏⴱ ⵍⵄⴰⴷⴰⵡⵉ, ⵜⴰⵏⵙⵙⵉⵅⴼⵜ ⵜⴰⵎⵣⵡⴰⵔⵓⵜ ⵏ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵉⵙⵉⴹⵏⵏ, ⴰⵙⵙ ⵏ ⵓⴽⵡⴰⵙ 27 ⴱⵕⴰⵢⵕ 2025, ⵢⴰⵏ ⵓⴽⴰⴱⴰⵕ ⵎⵓ ⵢⴰⵜⵜⵓⵢ ⵓⵙⵡⵉⵔ ⵏⵏⵙ ⵏ ⵉⵏⵙⵙⵉⵅⴼⵏ ⵏ ⵉⴳⵔⴰⵡⵏ ⵢⴰⵜⵜⵓⵢⵏ ⵏ ⵓⴳⴳⵉⵡⵙ ⴰⵥⵕⴼⴰⵏ ⴷ ⵜⵎⵙⵙⵉⴹⵏⵜ ⵉⴹⴼⴰⵕⵏ ⵉ ⵜⵎⵓⵏⵜ ⵜⴰⴷⵎⵙⴰⵏⵜ ⴷ ⵜⵓⴷⵔⵉⵎⵜ ⵏ ⵓⴷⴰⵔⴰⵎ ⵏ ⵡⴰⴼⵔⵉⵇⵢⴰ (UEMOA) ⴷ ⵉⴽⴰⴱⴰⵕⵏ ⴷⵉⴷⵙⵏ ⵉⵎⵓⵏⵏ, ⵏⵏⴰ ⵉⴳⴰⵏ ⵙⴳ ⵉⵡⴰⵏⴽⵏ ⵏ ⴱⵉⵏⵉⵏ ⴷ ⴱⵓⵕⴽⵉⵏⴰ ⴼⴰⵚⵓ ⴷ ⴽⵓⵜ ⴷⵉⴼⵡⴰⵕ ⴷ ⵖⵉⵏⵢⴰ ⴱⵉⵙⴰⵡ ⴷ ⵎⴰⵍⵉ ⴷ ⵙⵉⵏⵉⴳⴰⵍ ⴷ ⵟⵟⵓⴳⵓ, ⴷ ⵓⵢⵏⵏⴰ ⴳ ⵓⵙⴰⵜⵉ ⵏ ⵓⵎⵎⵙⴽⴰⵍ ⵏ ⵜⵎⵓⵣⴰⵢⵉⵏ ⵅⴼ ⵓⵙⴷⵓⵙ ⵏ ⵡⴰⵎⵎⴰⴽⵏ ⵏ ⵓⴳⴳⵉⵡⵙ ⵢⴰⵜⵜⵓⵢⵏ ⵏ ⵓⵥⵕⴼ ⴰⴳⴷⵓⴷⴰⵏ ⴳ ⵡⴰⴼⵔⵉⵇⵢⴰ.ⵜⵙⵙⵉⵡⵍ ⵎⴰⵙⵙⴰ ⵜⴰⵏⵙⵙⵉⵅⴼⵜ ⵜⴰⵎⵣⵡⴰⵔⵓⵜ ⴳ ⵓⵎⴰⴳⵔ ⴰⴷ, ⵅⴼ ⵓⴱⵓⵔⵣ ⵏⵏⵙ ⵉⴷⵔⴰⵏ ⵙ ⵓⵎⵢⴰⵡⴰⵙ ⵉⴱⵓⵖⵍⴰⵏ ⴷ ⵓⵙⵓⵍⴰⵏ ⴰⴽⴷ ⵉⴳⵔⴰⵡⵏ ⵉⴼⵔⵉⵇⵉⵢⵏ ⵉⵏⴳⴳⵯⴰ, ⴷⴰⵢ ⵜⵙⴷⴷⵉⴷ ⵜⴰⵎⵔⵉⵙⵜ ⵉⵕⵚⵚⴰⵏ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⵙ ⵓⵙⴷⵓⵙ ⵏ ⵓⵎⵢⴰⵡⴰⵙ ⴰⴷ, ⵙ ⵉⵙⵡⴰⵍⴰⵜⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙ ⵚⴹⵉⵚ ⴰⴷ ⵜ ⵉⵙⵙⵏⵔⵓ ⵕⴱⴱⵉ, ⴷ ⵓⴱⵣⴰⵔ ⵉⵕⵡⴰⵏ ⴳ ⵓⵙⵕⵚⵚⴰ ⵏ ⵢⴰⵏ ⵓⵙⴰⵜⵉ ⴰⵏⵎⴷⵓ ⵉⵙⵎⴷⵏ ⵉⵡⴰⵜⵜⵙⵏ ⵜⵉⴳⵎⵉ ⵏ ⵜⵙⵓⴳⴰⵔ ⴷ ⵓⵙⴱⵓⵖⵍⵓ ⵏ ⵜⴱⵔⵉⴷⵉⵏ ⵏ ⵜⵡⵓⵔⵉ, ⴷ ⵓⵙⵙⴱⵖⵔ ⵏ ⵜⴰⵜⵉⴽⵏⵓⵍⵓⵊⵉⵜ ⵜⴰⵜⵔⴰⵔⵜ ⴷ ⵜⵖⵉⵙⵜ ⵜⴰⵙⵎⴳⵓⵔⵜ, ⵏⵏⴰ ⵉⵎⵍⴰⵏ ⵜⵉⵕⵡⵉ ⵏⵏⵙⵏ ⴳ ⵓⵙⴷⵓⵙ ⵏ ⵓⵏⵖⴰⴷ ⵏ ⵓⴳⴳⵉⵡⵙ ⴷ ⵓⵙⵡⵓⴷⴷⵓ ⵏ ⵉⵎⵉⵣⴰⵏ. ⵎⴽⴷⴰ ⵜⵙⴷⴷⵉⴷ ⵎⴰⵙⵙⴰ ⵜⴰⵏⵙⵙⵉⵅⴼⵜ ⵜⴰⵎⵣⵡⴰⵔⵓⵜ ⴰⵛⵛⵉⵍ ⵏ ⵓⵙⵉⴷⴼ ⵏ ⵉⴳⵔⴰⵡⵏ ⵢⴰⵜⵜⵓⵢⵏ ⵏ ⵓⴳⴳⵉⵡⵙ ⴰⵥⵕⴼⴰⵏ ⴳ ⵡⴰⴼⵔⵉⵇⵢⴰ ⵙ ⵜⵖⴰⵔⴰⵙⵜ ⵉⴷⵔⴰⵏ ⴳ ⵜⴷⵉⵏⴰⵎⵉⵜ ⵏ ⵉⵙⵏⵜⴰⵢ ⴷ ⵜⵙⵏⵜⴰⵢⵉⵏ ⵜⵉⵎⵇⵔⴰⵏⵉⵏ ⵉⵍⵍⴰⵏ ⴳ ⵢⵉⴳⵔ ⵏ ⵓⴳⴳⵉⵡⵙ ⵢⴰⵜⵜⵓⵢⵏ ⵏ ⵓⵥⵕⴼ ⴰⴳⴷⵓⴷⴰⵏ ⴳ ⵓⵙⵡⵉⵔ ⴰⴳⵔⴰⵖⵍⴰⵏ, ⵉ ⵓⵙⵡⵓⵔⵉ ⵅⴼ ⵜⵏⵓⴼⴰ ⵏ ⵉⵡⴰⵏⴽⵏ ⴷ ⵉⵎⴰⴷⴰⵏⵏ ⵉⴼⵔⵉⵇⵉⵢⵏ.ⵙⴳ ⵜⵏⵉⵍⴰ ⵏⵏⵙ, ⵢⵓⵍⵖ ⵎⴰⵙⵙ ⵙⵉⵏⵢⵓⵏ ⵉⴼ ⵎⴰⵔⵉ ⴰⴷⵉⵙⵉⵏ, ⴰⵏⵙⵙⵉⵅⴼ ⵏ ⵜⵙⵏⴱⴹⴰⵢⵜ ⵏ ⵉⵙⵉⴹⵏⵏ ⵏ ⵜⵎⵓⵏⵜ ⵜⴰⴷⵎⵙⴰⵏⵜ ⴷ ⵜⵓⴷⵔⵉⵎⵜ ⵏ ⵓⴷⴰⵔⴰⵎ ⵏ ⵡⴰⴼⵔⵉⵇⵢⴰ, ⴰⵍⵜⴰⵖ ⵏ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵉⵙⵉⴹⵏⵏ ⴳ ⵓⵙⴷⵓⵙ ⵏ ⵓⵎⵢⴰⵡⴰⵙ ⵉⵙⵙⵓⵔⵏ ⴰⴽⴷ ⵉⵏⴳⴳⵯⴰ ⵏⵏⵙ ⴳ ⵓⵙⵡⵉⵔ ⴰⵎⵏⵥⴰⵡ, ⴷⴰⵢ ⵉⵙⴷⴷⵉⴷ ⵎⴰⵙ ⴷ ⵢⵓⵛⴽⴰ ⵓⵔⵣⴰⴼ ⵏ ⵉⴳⵏⵙⴰⵙⵏ ⵏ ⵉⴳⵔⴰⵡⵏ ⵢⴰⵜⵜⵓⵢⵏ ⵏ ⵓⴳⴳⵉⵡⵙ ⴰⵥⵕⴼⴰⵏ ⴷ ⵜⵎⵙⵙⵉⴹⵏⵜ ⵉⴹⴼⴰⵕⵏ ⵉ ⵜⵎⵓⵏⵜ ⵜⴰⴷⵎⵙⴰⵏⵜ ⴷ ⵜⵓⴷⵔⵉⵎⵜ ⵏ ⵓⴷⴰⵔⴰⵎ ⵏ ⵡⴰⴼⵔⵉⵇⵢⴰ ⴳ ⵓⵙⴰⵜⵉ ⵏ ⵓⵙⴰⵡⵔ ⵏ ⵓⵙⵜⵔⴰⵔ ⵏ ⵉⵎⴰⵙⵙⵏ ⵏ ⵓⴳⴳⵉⵡⵙ ⴳ ⵉⴳⵔⴰⵡⵏ ⵉⴹⴼⴰⵕⵏ ⵉ ⵜⵎⵓⵏⵜ, ⵙ ⵡⴰⵎⵎⵏ, ⵉⵇⵇⴰⵏ ⴷ ⴰⴷ ⵢⵉⵍⵉ ⵓⵏⵏⵓⵕⵥⵎ ⵅⴼ ⵜⵎⵙⴽⴰⵔ ⵉⵀⵢⵢⴰⵏ ⴷ ⵓⵙⵙⴱⵖⵔ ⵙⴳ ⵜⵔⵎⵉⵜⵉⵏ ⵉⵎⵓⵔⵙⵏ, ⴳⵉⵙⵏⵜ ⵜⵏⵏⴰ ⵉⵙⵖⵣⵏ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵉⵙⵉⴹⵏⵏ ⴳ ⵜⴳⵍⴷⵉⵜ ⵏ ⵍⵎⵖⵔⵉⴱ.ⴰⵀⴰ ⵉⵙⵏⵎⴰⵍⴰ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵉⵙⵉⴹⵏⵏ ⵙ ⵜⵎⵍⴷⴰ ⴰⴷ ⵢⴰⵏ ⵓⵙⴷⴷⵉ ⵏ ⵉⵏⵎⵓⵇⵇⴰⵔⵏ ⵉⵎⵢⴰⵖⵏ ⴷ ⵜⵙⴰⵡⵔⵉⵏ ⵏ ⵜⵡⵓⵔⵉ ⵉⵡⴰⵜⵜⵙⵏ ⴰⵙⵉⵥⴹⵕ ⵏ ⵓⴽⴰⴱⴰⵕ ⴰⴷ ⵢⴰⵏⵏⴰⵢ ⵙ ⵡⴰⴷⴰⵙ ⴰⵣⵓⵔⵜ ⵏ ⵓⴳⴳⵉⵡⵙ ⵏ ⵍⵎⵖⵔⵉⴱ, ⵙ ⵜⴰⵡⵏⴰ ⵏ ⵓⴼⵙⴰⵔ ⵏ ⵜⵎⵙⴽⴰⵔ ⵉⵀⵢⵢⴰⵏ ⴷ ⵉⵎⴰⵙⵙⵏ ⵉⵜⵜⵓⵙⵍⵍⵡⵉⵏ ⵏⵏⴰ ⵉⵙⵙⵎⵔⴰⵙ ⵓⵙⵇⵇⵉⵎ ⴳ ⵢⵉⴳⵔ ⵏ ⵓⴳⴳⵉⵡⵙ ⴷ ⵜⵙⵎⵓⵟⵟⵓⵏⵜ ⴷ ⵓⵙⴼⵙⵉ ⵏ ⵜⵎⵓⵛⴰ. ⵎⵍⴰⵏ ⵉⵏⵎⵓⵇⵇⴰⵔⵏ ⴰⴷ ⵜⵉⵍⴰⵍⵜ ⵜⴰⴷⵙⵍⴰⵏⵜ ⵏ ⵉⵎⴰⵙⵙⵏ ⴰⴷ ⴳ ⵓⵙⵖⵓⴷⵓ ⵏ ⵜⵕⵡⵉ ⵏ ⵜⵡⵓⵔⵉ ⵏ ⵓⴳⴳⵉⵡⵙ ⴷ ⵓⵙⴷⵓⵙ ⵏ ⵜⵓⵙⵓⵔⵜ ⵏ ⵜⴼⵍⵍⴰⵡⵉⵏ ⵏⵏⵙ.ⵢⵓⴷⴼ ⵓⵏⵎⵓⵇⵇⴰⵔ ⴰⴷ ⴳ ⵓⵙⴰⵜⵉ ⵏ ⵓⵙⴷⵓⵙ ⵏ ⵓⵎⵢⴰⵡⴰⵙ ⴰⴽⴷ ⵉⴳⵔⴰⵡⵏ ⵉⴼⵔⵉⵇⵉⵢⵏ ⵉⵏⴳⴳⵯⴰ, ⵙⵍⴰⵡⴰⵏ ⴰⴽⴽⵯ ⵍⵍⵉⴳ ⵜⵍⵍⴰ ⵜⵉⵍⴰⵍⵜ ⵏⵏⴰ ⵉⵙⴽⴰⵔ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵉⵙⵉⴹⵏⵏ ⵉⴳⴰⵏ ⴰⵏⴼⵍⵓⵙ ⴰⵎⴰⵜⴰⵢ ⵏ ⵜⵎⴰⴷⴷⴰⵙⵜ ⵜⴰⴼⵔⵉⵇⵉⵜ ⵏ ⵉⴳⵔⴰⵡⵏ ⵢⴰⵜⵜⵓⵢⵏ ⵏ ⵓⴳⴳⵉⵡⵙ ⴰⵥⵕⴼⴰⵏ ⴷ ⵜⵎⵙⵙⵉⴹⵏⵜ (ⴰⴼⵕⵓⵙⴰⵢ), ⴰⵔ ⵉⴱⵣⵣⵔ ⵓⵢⴰⴷ ⴳ ⵓⵙⵅⵉⵜⵔ ⵏ ⵓⵎⵏⴰⴹ ⵏ ⵓⵎⵢⴰⵡⴰⵙ ⵏⴳⵔ ⵢⵉⴼⴼⵓⵙ ⴷ ⵢⵉⴼⴼⵓⵙ ⴷ ⵓⵙⴷⵔⵓ ⵏ ⵜⵓⵙⵓⵔⵜ ⵏⵏⵙ ⵜⵓⵎⵏⵉⴳⵜ ⵉⵡⴰⵜⵜⵙⵏ ⴰⵙⴷⵓⵙ ⵏ ⵜⵏⵏⵓⴱⴹⴰ ⵉⵀⵢⵢⴰⵏ ⴷ ⵜⵙⵓⵙⵖⵜ ⴷ ⵓⵙⵇⵙⵉ ⴳ ⵜⵎⵏⵥⴰⵡⵜ ⵜⴰⴼⵔⵉⵇⵉⵜ.

ⵜⵙⵏⴱⴳⵉ ⵎⴰⵙⵙⴰ ⵣⵉⵏⴱ ⵍⵄⴰⴷⴰⵡⵉ, ⵜⴰⵏⵙⵙⵉⵅⴼⵜ ⵜⴰⵎⵣⵡⴰⵔⵓⵜ ⵏ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵉⵙⵉⴹⵏⵏ, ⴰⵙⵙ ⵏ ⵡⴰⵢⵏⴰⵙ 24 ⴱⵕⴰⵢⵕ 2025, ⵎⴰⵙⵙ ⴰⵏⵙⵙⵉⵅⴼ ⵏ ⵜⵙⵏⴱⴹⴰⵢⵜ ⵏ ⵉⵙⵉⴹⵏⵏ ⵏ ⵜⵎⵓⵏⵜ ⵜⴰⴷⵎⵙⴰⵏⵜ ⴷ ⵜⵓⴷⵔⵉⵎⵜ ⵏ ⵓⴷⴰⵔⴰⵎ ⵏ ⵡⴰⴼⵔⵉⵇⵢⴰ ⴷ ⵓⴽⴰⴱⴰⵕ ⵏⵏⴰ ⴷⵉⴷⵙ ⵉⵎⵓⵏⵏ, ⴳ ⵓⵙⴰⵜⵉ ⵏ ⵢⴰⵏ ⵓⵔⵣⴰⴼ ⵏ ⵜⵡⵓⵔⵉ ⵏⵏⴰ ⵉⵙⴽⵔ ⵖⵔ ⵓⵙⵇⵇⵉⵎ ⴰⵔ 28 ⴱⵕⴰⵢⵕ 2025.ⴳ ⵓⵏⵎⵓⵇⵇⴰⵔ ⴰⴷ, ⵜⵙⵏⵎⴰⵍⴰ ⵎⴰⵙⵙⴰ ⵜⴰⵏⵙⵙⵉⵅⴼⵜ ⵜⴰⵎⵣⵡⴰⵔⵓⵜ ⵢⴰⵜ ⵜⵖⵉⵎⵉⵜ ⵏ ⵉⵎⴹⴰⴽⴰⵕⵏ, ⵏⵏⴰ ⴳ ⵉⵍⵍⴰ ⵓⴼⵙⴰⵔ ⵏ ⵜⵔⵎⵉⵜ ⵏ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵉⵙⵉⴹⵏⵏ ⴳ ⵢⵉⴳⵔ ⵏ ⵓⴳⴳⵉⵡⵙ ⵏ ⵓⵥⵕⴼ ⴰⴳⴷⵓⴷⴰⵏ, ⴷ ⵜⴱⵔⵉⴷⵜ ⵏ ⵓⴳⴳⵉⵡⵙ ⵏⵏⴰ ⵉⴹⴼⴰⵕ. ⴷⴰⵢ ⵜⴱⴷⵔ ⵎⴰⵙⵙⴰ ⵜⴰⵏⵙⵙⵉⵅⴼⵜ ⵜⴰⵎⵣⵡⴰⵔⵓⵜ ⵉⵙⵡⴰⵍⴰⵜⵏ ⵉⵙⵜⵔⴰⵜⵉⵊⵉⵢⵏ ⵏ ⵜⵙⵏⴱⴹⴰⵢⵉⵏ ⵜⵉⵥⵕⴼⴰⵏⵉⵏ ⵍⵓⵎⵎⵏ ⴳ ⵎⴰⴷ ⵉⵥⵍⵉⵏ ⵙ ⵜⵙⵖⵣⵏⵜ ⵏ ⵢⴰⵜ ⵜⵎⵢⴰⴷⴰⵙⵜ ⵜⴰⵎⴰⵢⵏⵓⵜ ⴳ ⵓⵙⴽⴰⵔ ⵏ ⵜⴰⵏⴰⴹⵜ ⵜⴰⵙⴳⵯⵙⴰⵏⵜ ⴷ ⵜⴹⴼⵕⵉ ⵏ ⵉⵙⵖⵍⴰⴼ ⴷ ⵓⵍⵜⴰⵖ ⴳ ⵓⵙⴰⵡⵔ ⵏ ⵜⵙⵎⵓⵟⵟⵓⵏⵜ ⴰⵡⴷ ⴰⵍⴰⵙ ⵏ ⵓⵙⵡⵉⵏⴳⵎ ⴳ ⵓⵏⴳⵔⴰⵡ ⵏ ⵜⵎⵙⵜⴳⴳⴰⵔⵜ ⵏ ⵉⵎⵙⵡⵓⴷⴷⴰ ⵉⴳⴷⵓⴷⴰⵏⵏ. ⴳⴰⵏ ⵉⵙⵡⴰⵍⴰⵜⵏ ⵏⵏⴰ ⵉⵡⴰⵜⵜⵙⵏ ⴰⵙⵖⵓⴷⵓ ⵏ ⵜⵓⴷⵔⵜ ⵜⴰⵎⴰⵜⴰⵢⵜ ⴷ ⵓⴱⵣⴰⵔ ⴳ ⵓⵙⴼⵓⵍⴽⵉ ⵏ ⵓⵙⵡⵓⴷⴷⵓ ⴰⴳⴷⵓⴷⴰⵏ ⵙ ⵜⵖⴰⵔⴰⵙⵜ ⵏⵏⴰ ⵉⴱⵣⵣⵔⵏ ⴳ ⵓⵙⵔⵓⵙ ⵜⵓⵙⵓⵔⵜ ⵜⵓⵎⵏⵉⴳⵜ ⴳ ⵡⴰⴷⴷⴰⴷⵏ ⵏ ⵜⵓⴷⵔⵜ ⵏ ⵉⵏⵎⵓⵔⴰⵏ.ⵙⴳ ⵜⵏⵉⵍⴰ ⵏⵏⵙ, ⵉⵙⵙⵓⵜⴳ ⵎⴰⵙⵙ ⴰⵏⵙⵙⵉⵅⴼ ⵙⵉⵏⵢⵓⵏ ⵉⴼ ⵎⴰⵔⵉ ⴰⴷⵉⵙⵉⵏ ⵜⵓⴳⴳⴰⵙ ⵏⵏⴰ ⵉⵙⴽⴰⵔ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵉⵙⵉⴹⵏⵏ ⴳ ⵡⴰⵏⵏⴰⵍ ⴷ ⵓⵙⴷⵓⵙ ⵏ ⵜⵡⵓⵔⵉ ⵏ ⵓⴳⴳⵉⵡⵙ ⴳ ⵓⵙⵡⵉⵔ ⴰⵎⵏⵥⴰⵡ ⴷⴰⵢ ⵉⵙⴷⴷⵉⴷ ⴰⵖⵓⴷⵓ ⵏ ⵓⵙⵏⵓⴱⴳ ⴷ ⵜⵏⴼⴽⴰⵢⵜ ⵏⵏⴰ ⵉⵚⴰⵃⴰⵏ ⵉ ⵓⴽⴰⴱⴰⵕ.ⵉⴳⴰ ⵓⵏⵎⵓⵇⵇⴰⵔ ⴰⴷ ⵢⴰⵜ ⵜⵎⵍⴷⴰ ⵜⴰⵏⴼⵔⴰⵔⵜ ⵏ ⵓⵔⵣⵣⵓ ⵏ ⵉⴱⵔⴷⴰⵏ ⵏ ⵓⵙⵎⵔⵙⵍ ⴷ ⵓⵙⴷⵓⵙ ⵏ ⵓⵎⵢⴰⵡⴰⵙ ⴰⴳⵜⵉⵔⴰⵏ ⵏⴳⵔ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵉⵙⵉⴹⵏⵏ ⴷ ⵉⵏⴳⴳⵯⴰ ⵏⵏⵙ ⴳ ⵜⵎⵓⵏⵜ ⵜⴰⴷⵎⵙⴰⵏⵜ ⴷ ⵜⵓⴷⵔⵉⵎⵜ ⵏ ⵓⴷⴰⵔⴰⵎ ⵏ ⵡⴰⴼⵔⵉⵇⵢⴰ, ⵍⵓⵎⵎⵏ ⵍⵍⵉⴳ ⵜⵍⵍⴰ ⵜⵉⵍⴰⵍⵜ ⵏⵏⴰ ⵉⵙⴽⴰⵔ ⵍⵎⵖⵔⵉⴱ ⵉⴳⴰⵏ ⴰⵏⴼⵍⵓⵙ ⴰⵎⴰⵜⴰⵢ ⵏ ⵜⵎⴰⴷⴷⴰⵙⵜ ⵜⴰⴼⵔⵉⵇⵉⵜ ⵏ ⵉⴳⵔⴰⵡⵏ ⵢⴰⵜⵜⵓⵢⵏ ⵏ ⵓⴳⴳⵉⵡⵙ ⴰⵥⵕⴼⴰⵏ ⴷ ⵜⵎⵙⵙⵉⴹⵏⵜ (ⴰⴼⵕⵓⵙⴰⵢ).

ⴰⵔ ⵉⵙⵏⵖⵎⴰⵙ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵉⵙⵉⴹⵏⵏ ⵓⴳⴳⵉⴷⵏ ⵏⵏⴰ ⴰⵙⵏ ⵜⵓⵛⵛⵍ ⵜⵙⴳⵓⵔⵉ ⵜⵓⵛⵛⵉⵍⵜ ⵏ ⵡⴰⴳⵍⴰ ⵉⵙ ⵜⴰⵎⵀⵍⵜ ⵏ ⵓⵙⵎⴰⵢⵏⵓ ⵏ ⵜⵙⴳⵓⵔⵉⵡⵉⵏ ⵜⵓⵛⵛⵉⵍⵉⵏ ⴽⵓ ⴽⵕⴰⴹ ⵉⵙⴳⴳⵯⴰⵙⵏ, ⵉⵙⵎⵉⵍⵏ ⵏ ⵉⵎⵙⵖⴰⵏⵏ ⴷ ⵉⵎⴰⵡⴰⵙⵏ ⵉⴹⴼⴰⵕⵏ ⴰⵡⴰⵏⴽ ⴷ ⵜⴳⵔⴰⵡⵉⵏ ⵜⵉⵎⵓⵔⴰⵏⵉⵏ ⴷ ⵜⵓⵚⴽⴰⵡⵉⵏ ⵜⵉⵎⴰⵜⴰⵢⵉⵏ ⴷ ⵉⴳⵔⴰⵡⵏ ⵢⴰⴹⵏ ⵉⵍⵍⴰⵏ ⴷⴷⴰⵡ ⵏ ⵜⵖⵖⵓⵍⴼⴰ ⵏⵏⵙⵏ, ⵜⵏⵜⴰ ⴰⵙⵙ ⵏ 03 ⴱⵕⴰⵢⵕ 2025 ⴷ ⴰⴷ ⵜⵇⵇⵉⵎ ⴳ ⵡⴰⵢⵢⵓⵔ ⴰⴷ ⵙ ⵓⵎⵙⴰⵙⴰ ⴷ ⵉⵙⴱⴷⴰⴷⵏ ⵏ ⵓⴳⵟⵟⵓⵎ ⵡⵉⵙ ⵙⵉⵏ ⵏ ⵓⵎⵏⵏⵉ ⵡⵉⵙ ⵙⵎⵎⵓⵙ ⵏ ⵓⵙⵍⴳⵏ 54.06 ⵉⵣⴷⵉⵏ ⴷ ⵓⵙⵔⵓⵙ ⵏ ⵜⵙⴳⵓⵔⵉ ⵜⵓⵛⵛⵉⵍⵜ ⵏ ⴽⵔⴰ ⵏ ⵉⵎⵙⵜⵉⵢⵏ ⵏ ⵉⵙⵇⵇⵉⵎⵏ ⵉⴷⵖⵔⴰⵏⵏ ⴷ ⵜⵎⵚⵕⵉⵢⵉⵏ ⵜⵉⵣⵣⵓⵍⴰⵏⵉⵏ ⴷ ⴽⵔⴰ ⵏ ⵉⵙⵎⵉⵍⵏ ⵏ ⵉⵎⵙⵖⴰⵏⵏ ⵏⵉⵖ ⵉⵎⴰⵡⴰⵙⵏ ⵉⴳⴷⵓⴷⴰⵏⵏ ⵙ ⵡⴰⴳⵍⴰ ⵏⵏⵙⵏ.ⴳ ⵓⵙⴰⵜⵉ ⴰⴷ, ⴰⵔ ⵉⵇⵇⴰⵔ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵉⵙⵉⴹⵏⵏ ⵉ ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵎⵏⵜⴰⵢⵏ, ⵙ ⵜⵙⴳⵓⵔⵉ ⵏ ⴰⴷ ⵙⴷⴷⵉⴷⵏ ⵖⵔ ⵓⵎⵙⵜⴳⴳⴰⵔ ⵉⵎⵎⵔⵙⵏ ⵙⴳ ⵜⵏⵉⵍⴰ ⵏ ⵜⵏⴱⴰⴹⵉⵏ ⵉⵥⵍⵉⵏ ⵙ ⵓⵙⴽⴽⵉⵏ ⴰⴷ, ⵉⵙ ⵍⵍⴰⵏ ⵉⵙⵎⴰⵡⵏ ⵏⵏⵙⵏ ⴳ ⵜⵍⴳⴰⵎⵜ ⵏ ⵉⵎⵓⵛⵛⵍⵏ ⵏⵏⴰ ⵥⵍⵉⵏⵜ ⵜⵏⴱⴰⴹⵉⵏ ⵜⵓⵏⴱⵉⴹⵉⵏ ⵜⵉⵎⵏⵜⴰⵢⵉⵏ.ⵜⴰⴼⴰ ⴰⴷ ⵢⵉⵍⵉ ⵓⵙⵏⵎⴰⵍⴰ ⵏ ⵜⵎⵀⵍⵜ ⵏ ⵡⵓⴹⵓⴼ ⵏ ⵜⵙⴳⵓⵔⵉⵡⵉⵏ ⴷ ⵓⵙⴽⴰⵔ ⵏⵏⵙⵏⵜ ⴳ ⵡⴰⴷⴷⴰⴷⵏ ⵉⵖⵓⴷⴰⵏ, ⵀⴰ ⵏⵏ ⵉⵙⵔⵙ ⵓⵙⵇⵇⵉⵎ ⵎⵏⵉⴷ ⵏ ⵉⵎⵓⵛⵛⵍⵏ ⵢⴰⵜ ⵜⵙⵏⵙⵉ ⵜⴰⵙⵏⵎⴰⵍⴰⵢⵜ ⴳ ⵜⵡⵡⵓⵔⵜ ⵏⵏⵙ ⵜⴰⵍⵉⴽⵟⵕⵓⵏⵉⵜ, ⴰⵔ ⵜⵏ ⵜⴻⵜⵜⴰⵊⵊⴰ ⴰⴷ ⴰⵎⵥⵏ ⵜⴰⴽⵜⵓⵜ ⵖⵔ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵉⵙⵉⴹⵏⵏ ⵏⵉⵖ ⵉⵙⵇⵇⵉⵎⵏ ⵉⵏⵎⵏⴰⴹⵏ ⵏ ⵉⵙⵉⴹⵏⵏ ⵙ ⵓⵎⵙⴰⵙⴰ ⴷ ⵜⵥⵍⴰⵢⵜ ⵜⴰⵎⵓⵔⴰⵏⵜ, ⵜⴰⴼⴰ ⴰⴷ ⵙⵔⵙⵏ ⵜⵉⵙⴳⵓⵔⵉⵡⵉⵏ ⵏⵏⵙⵏ ⵙ ⵜⵎⴰⵎⴽⵉⵏ ⴷ ⵜⴼⴰⴷⵉⵡⵉⵏ ⵜⵓⵍⴳⵉⵏⵉⵏ.ⵉ ⵓⴳⴰⵔ ⵏ ⵡⵓⵎⵍⴰⵏ, ⴽⵛⵎⴰⵜ ⵖⵔ ⵡⴰⵙⵉⵜ ⴰⵎⴰⴷⴷⵓⴷ ⵏ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵉⵙⵉⴹⵏⵏ, ⴳ ⵓⵙⵖⵓⵏ ⴰⴷ: www.courdescomptes.ma.

ⵉⴷⵔⴰ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵉⵙⵉⴹⵏⵏ ⵙⴳ ⵜⵓⴳⴳⵓⴳⵜ, ⵍⵍⵉⴳ ⵉⴳⴰ ⴰⴳⵎⴰⵎ ⴰⵎⵖⵍⴰⵍ, ⵙ ⵜⴳⵏⵙⴰⵙⵜ ⵏ ⵎⴰⵙⵙⴰ ⵜⴰⵏⵙⵙⵉⵅⴼⵜ ⵜⴰⵎⵣⵡⴰⵔⵓⵜ ⵏ ⵓⵙⵇⵇⵉⵎ ⴳ ⵜⵙⵎⵓⵏⵉ ⵏ ⵓⵙⵇⵇⵉⵎ ⵏ ⵉⵎⵣⵣⵔⴰⵢⵏ ⵉⴱⵕⵕⴰⵏⵉⵢⵏ ⵏ ⵜⵎⵓⵏⵜ ⵜⴰⴼⵔⵉⵇⵉⵜ ⵏⵏⴰ ⵉⵜⵜⵓⵙⵏⵎⴰⵍⴰⵏ ⴰⵙⵙ ⵏ 22 ⴷ 23 ⵉⵏⵏⴰⵢⵔ 2025 ⴳ ⴰⵕⵓⵛⴰ ⴳ ⵜⴰⵏⵥⴰⵏⵢⴰ.ⵜⵎⵎⵓⴳ ⴳ ⵜⵙⵎⵓⵏⵉ ⴰⴷ ⵜⵙⵖⵣⵏⵜ ⵏ ⵜⴰⵏⴰⴹⵜ ⵏ ⵓⴳⴳⵉⵡⵙ ⵉⵥⵍⵉⵏ ⵙ ⵓⵙⵡⵓⴷⴷⵓ ⵏ ⵓⴱⵕⵍⴰⵎⴰⵏ ⴰⴼⵔⵉⵇⵉ ⵉⵍⴰⵏ ⴰⵙⵖⵉⵎ ⵏⵏⵙ ⴳ ⵢⵉⴼⴼⵓⵙ ⵏ ⵡⴰⴼⵔⵉⵇⵢⴰ ⴷ ⵓⵙⵜⴰⵢ ⵏ ⵓⵏⵙⵙⵉⵅⴼ ⴰⵎⴰⵢⵏⵓ ⵏ ⵓⵙⵇⵇⵉⵎ ⵏ ⵉⵎⵣⵣⵔⴰⵢⵏ ⵉⵜⵜⴰⵡⴱⴷⴰⵔⵏ ⴳ ⵜⵉⵣⵉ ⵏ 2025-2026, ⵜⵉⵍⵉ ⴳⵉⵙ ⵜⵙⵖⵣⵏⵜ ⵏ ⵢⴰⵜ ⵜⵙⵜⵔⴰⵜⵉⵊⵉⵜ ⴷ ⵓⵖⴰⵡⴰⵙ ⵏ ⵓⵣⵣⵔⴰⵢ ⵏ ⵉⵙⵉⴹⵏⵏ ⵏ ⵜⵎⵓⵏⵜ ⵜⴰⴼⵔⵉⵇⵉⵜ ⵏ ⵓⵙⴳⴳⵯⴰⵙ ⵏ 2024 ⵏⵏⴰ ⵖⴰ ⵉⵜⵜⵓⵏⵖⴷⵏ ⴳ ⵓⵙⴳⴳⵯⴰⵙ ⵏ 2025, ⴰⵡⴷ ⴰⴱⵟⵟⵓ ⵏ ⵜⵙⵎⵉⴳⴰⵍ ⵏⴳⵔ ⵉⴳⵔⴰⵡⵏ ⵏ ⵓⴳⴳⵉⵡⵙ ⵉⴳⴰⵏ ⵉⴳⵎⴰⵎⵏ ⴳ ⵓⵙⵇⵇⵉⵎ ⵏ ⵉⵎⵣⵣⵔⴰⵢⵏ ⵉⴱⵕⵕⴰⵏⵉⵢⵏ. ⴳ ⵓⵙⴰⵜⵉ ⴰⴷ ⵉⵎⴰⴳⵍ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵉⵙⵉⴹⵏⵏ ⵙ ⵓⵙⵏⵖⴷ ⵏ ⵉⵙⴳⵓⵎⵏ ⵉⵣⴷⵉⵏ ⴷ ⵓⵙⵡⵓⴷⴷⵓ ⵏ ⵉⵙⵙⴰⵔⵓⵜⵏ ⴷ ⵓⵙⴱⴰⵢⵏⵓ ⴷ ⵡⴰⴳⵍⴰ ⴰⵥⵕⴼⴰⵏ ⴳ ⵓⵙⵡⵉⵔ ⵏ ⵜⵙⵎⵉⵔⵉⵜ ⵏ ⵜⵎⵓⵏⵜ ⵜⴰⴼⵔⵉⵇⵉⵜ; ⵎⴽⴷⴰ ⵉⵎⴰⴳⵍ ⴳ ⵓⵙⵡⵉⵔ ⵏ ⵉⴳⵔⴰⵡⵏ ⵉⴹⴼⵕⵏ ⵉ ⵜⵎⵓⵏⵜ ⵜⴰⴼⵔⵉⵇⵉⵜ ⵙ ⵓⵏⵖⴰⴷ ⵏ ⵉⵙⵉⴹⵏⵏ ⵏ ⵜⵙⵏⵓⵔⴰⵢⵜ ⵏ ⵓⴷⵔⴰⵡ ⴰⵎⴰⵢⵏⵓ ⵉ ⵜⴳⵎⵉ ⵏ ⵡⴰⴼⵔⵉⵇⵢⴰ (AUDA-NEPAD) ⵏⵏⴰ ⵜⵓⵡⴹ ⵜⵎⵙⴰⵙⵜⵍⵜ ⵏⵏⵙ ⴳ ⵓⵙⴳⴳⵯⴰⵙ ⵏ 2024 ⴰⵜⵜⴰⵢⵏ ⵏ 61 ⵏ ⵓⵎⵍⵢⵓⵏ ⵏ ⴷⵓⵍⴰⵕ ⵏ ⵎⴰⵔⵉⴽⴰⵏ ⴷ ⵜⵙⵇⵇⵉⵎⵜ ⵜⴰⴼⵔⵉⵇⵉⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵉⵎⴰⴷⴰⵏⵏ ⵙ ⵜⵎⵙⴰⵙⵜⵍⵜ ⵉⵣⵔⵉⵏ ⴰⵜⵉⴳ ⵏ ⵙⵎⵎⵓⵙ (5) ⵏ ⵓⵎⵍⵢⵓⵏ ⵏ ⴷⵓⵍⴰⵕ ⵏ ⵎⴰⵔⵉⴽⴰⵏ ⴳ ⵓⵙⴳⴳⵯⴰⵙ ⴰⵏⵏ ⵏⵏⵉⵜ.ⴷⴰⵢ ⵜⵙⵙⴽⵜⵉ ⵎⴰⵙⵙⴰ ⵣⵉⵏⴱ ⵍⵄⴰⴷⴰⵡⵉ, ⵜⴰⵏⵙⵙⵉⵅⴼⵜ ⵜⴰⵎⵣⵡⴰⵔⵓⵜ ⵏ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵉⵙⵉⴹⵏⵏ, ⵙ ⵜⵎⵍⴷⴰ ⴰⴷ ⵙ ⵡⴰⵛⵛⵉⵍ ⵏ ⵓⵙⵎⵀⵍ ⵏ ⵉⵙⵖⵍⴰⴼ ⵏⵏⴰ ⴷ ⵉⵙⵙⵓⴼⵖ ⵓⵙⵇⵇⵉⵎ ⵏ ⵉⵎⵣⵣⵔⴰⵢⵏ ⵉⴱⵕⵕⴰⵏⵉⵢⵏ ⵉ ⵓⵙⵖⵓⴷⵓ ⵏ ⵓⵙⵡⵓⴷⴷⵓ ⴰⵥⵕⴼⴰⵏ ⴷ ⵜⵏⵏⵓⴱⴹⴰ ⵏ ⵜⵎⵓⵏⵜ ⵜⴰⴼⵔⵉⵇⵉⵜ ⴷ ⵓⵙⵎⵔⵙ ⵏ ⵜⵉⵜⵉⵇⵏⵉⵢⵉⵏ ⵜⵉⵎⵓⵟⵟⵓⵏⵉⵏ ⵜⴰⴼⴰ ⴰⴷ ⵢⵉⵍⵉ ⵓⵙⵀⵡⵏ ⵏ ⵜⵎⵀⵍⵜ ⴰⴷ. ⵎⴽⴷⴰ ⵜⵙⵙⵉⵡⵍ ⵎⴰⵙ ⵢⵓⵊⴰⴷ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵉⵙⵉⴹⵏⵏ ⵃⵎⴰ ⴰⴷ ⵉⴱⴹⵓ ⵜⵉⵔⵎⵉⵜ ⵏⵏⵙ ⴳ ⵢⵉⴳⵔ ⴰⴷ ⵏⵏⴰ ⵢⵓⵎⴰⵏⵏ ⴳ ⵜⴷⴽⴽⵯⴰⵏⵜ ⵜⴰⵎⵓⵟⵟⵓⵏⵜ ⵏ ⵜⴹⴼⵕⵉ ⵏ ⵓⵣⵣⴳⵉⵔ ⵏ ⵉⵙⵖⵍⴰⴼ.ⵉⵇⵇⴰⵏ ⴷ ⵓⴱⴷⴰⵔ ⵉⵙ ⵉⵙⵎⵓⵏ ⵓⵙⵇⵇⵉⵎ ⵏ ⵉⵎⵣⵣⵔⴰⵢⵏ ⵢⴰⵏ ⴷ ⵎⵔⴰⵡ (11) ⵏ ⵓⴳⵎⴰⵎ ⵙⴳ ⵉⵏⵙⵙⵉⵅⴼⵏ ⵏ ⵚⴹⵉⵚ ⵏ ⵉⴳⵔⴰⵡⵏ ⵢⴰⵜⵜⵓⵢⵏ ⵏ ⵓⴳⴳⵉⵡⵙ ⵉⵍⴰⵏ ⵜⴰⴳⵎⴰⵎⵜ ⵜⴰⵎⵖⵍⴰⵍⵜ, ⵏⵏⴰ ⵉⴳⴰⵏ ⵉⴳⵏⵙⴰⵙⵏ ⵏ ⵉⵡⴰⵏⴽⵏ ⵉⵍⴰⵏ ⵜⵉⴱⵣⴰⵔⵉⵏ ⵜⵉⵎⵇⵔⴰⵏⵉⵏ ⴳ ⵜⵎⵙⴰⵙⵜⵍⵜ ⵏ ⵜⵎⵓⵏⵜ ⵜⴰⴼⵔⵉⵇⵉⵜ, ⵉⴳⴰⵏ ⵍⵎⵖⵔⵉⴱ ⴷ ⵎⵉⵚⵕ ⴷ ⵏⵉⵊⵉⵔⵢⴰ ⴷ ⴰⵏⴳⵓⵍⴰ ⴷ ⴷⵣⴰⵢⵔ ⴷ ⵢⵉⴼⴼⵓⵙ ⵏ ⵡⴰⴼⵔⵉⵇⵢⴰ; ⴰⵡⴷ ⵉⵏⵙⵙⵉⵅⴼⵏ ⵏ ⵉⴳⵔⴰⵡⵏ ⵏ ⵓⴳⴳⵉⵡⵙ ⵏⵏⴰ ⵉⵜⵜⴳⵏⵙⴰⵙⵏ ⴽⵓ ⵙⵉⵏ ⵉⵙⴳⴳⵯⴰⵙⵏ ⵜⵉⵙⴳⵉⵡⵉⵏ ⵜⵉⵊⵖⵔⴰⴼⵉⵢⵏ ⵏ ⵜⵎⵏⵥⴰⵡⵜ ⵜⴰⴼⵔⵉⵇⵉⵜ (ⴰⴳⴰⴼⴰⵢ ⴷ ⵢⵉⴼⴼⵓⵙ ⴷ ⵓⵙⵏⵇⵔ ⴷ ⵓⴷⴰⵔⴰⵎ ⴷ ⵡⴰⵎⵎⴰⵙ)ⴰⵔ ⵉⴱⵣⵣⵔ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵉⵙⵉⴹⵏⵏ ⴳ ⵓⵙⵏⵖⴷ ⵏ ⵉⵙⵉⴹⵏⵏ ⵏ ⵜⵎⵓⵏⵜ ⵜⴰⴼⵔⵉⵇⵉⵜ ⵙⴳ 2018 ⴷⴰⵢ ⵜⵙⵎⵓⵏⴰ ⵜⴱⵣⴰⵔⵜ ⵏⵏⵙ ⴳ ⵓⵙⴳⴳⵯⴰⵙ ⵏ 2023 ⴰⵙⵏⵖⴷ ⵏ ⵉⵙⴳⵓⵎⵏ ⵉⵣⴷⵉⵏ ⴷ ⵓⵙⵡⵓⴷⴷⵓ ⴰⵥⵕⴼⴰⵏ ⴷ ⵉⵙⵙⴰⵔⵓⵜⵏ ⴷ ⵉⴷⵔⵉⵎⵏ ⵏ ⵉⵎⴷⵔⴰⵡⵏ ⴳ ⵎⴰⴷ ⵉⵣⴷⵉⵏ ⴷ ⵉⵙⵉⴹⵏⵏ ⵏ ⵜⵙⵎⵉⵔⵉⵜ ⵏ ⵜⵎⵓⵏⵜ ⵜⴰⴼⵔⵉⵇⵉⵜ, ⴰⵡⴷ ⵉⵙⵉⴹⵏⵏ ⵏ ⵜⵙⵏⵓⵔⴰⵢⵜ ⵏ ⵓⴷⵔⴰⵡ ⴰⵎⴰⵢⵏⵓ ⵉ ⵜⴳⵎⵉ ⵏ ⵡⴰⴼⵔⵉⵇⵢⴰ (AUDA – NEPAD) ⴷ ⵓⵙⵇⵇⵉⵎ ⴰⴷⵎⵙⴰⵏ ⴷ ⵓⵏⴰⵎⵓⵏ ⴷ ⵓⴷⵍⵙⴰⵏ (ECOSOCC).

ⵙ ⵓⵎⵙⴰⵙⴰ ⴷ ⵉⵙⴱⴷⴰⴷⵏ ⵏ ⵓⴳⵟⵟⵓⵎ ⴰⵎⴳⴳⴰⵔⵓ ⵏ ⵓⵎⴰⴳⵔⴰⴷ 148 ⵏ ⵓⴷⵓⵙⵜⵓⵔ, ⵜⵙⵙⵎⵏⵉⴷ ⵎⴰⵙⵙⴰ ⵣⵉⵏⴱ ⵍⵄⴰⴷⴰⵡⵉ, ⵜⴰⵏⵙⵙⵉⵅⴼⵜ ⵜⴰⵎⵣⵡⴰⵔⵓⵜ ⵏ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵉⵙⵉⴹⵏⵏ, ⴳ ⵡⴰⵙⵙ ⵏ ⵡⴰⴽⵕⴰⵙ 15 ⵉⵏⵏⴰⵢⵔ 2025, ⵢⴰⵜ ⵜⴽⵛⵛⵓⵎⵜ ⵅⴼ ⵜⵡⵓⵔⵉⵡⵉⵏ ⵏ ⵜⵙⵏⴱⴹⴰⵢⵉⵏ ⵜⵉⵥⵕⴼⴰⵏⵉⵏ ⴳ ⵓⵙⴳⴳⵯⴰⵙ ⵏ 2023-2024 ⵎⵏⵉⴷ ⵏ ⵓⴱⵕⵍⴰⵎⴰⵏ ⵙ ⵙⵏⴰⵜ ⵏ ⵜⵎⵚⵕⵉⵢⵉⵏ ⵏⵏⵙ.

ⴷⴼⴼⵉⵔ ⵏ ⵓⵙⵎⵏⵉⴷ ⵏ ⵜⴰⵏⴰⴹⵜ ⵜⴰⵙⴳⵯⵙⴰⵏⵜ ⵏ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵉⵙⵉⴹⵏⵏ ⵏ ⵓⵙⴳⴳⵯⴰⵙ ⵏ 2023-2024 ⵉ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙ ⵚⴹⵉⵚ ⴰⴷ ⵜ ⵉⵙⵙⵏⵔⵓ ⵕⴱⴱⵉ ⵢⴰⵡⵙ ⴰⵙ, ⵙⴳ ⵜⵏⵉⵍⴰ ⵏ ⵎⴰⵙⵙⴰ ⵜⴰⵏⵙⵙⵉⵅⵜ ⵜⴰⵎⵣⵡⴰⵔⵓⵜ ⵏ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵉⵙⵉⴹⵏⵏ, ⵙ ⵓⵣⵣⴳⵉⵔ ⵏ ⵉⵙⴱⴷⴰⴷⵏ ⵏ ⵓⵎⴰⴳⵔⴰⴷ 148 ⵏ ⵓⴷⵓⵙⵜⵓⵔ ⴷ ⵓⵎⵏⵏⵉ 100 ⵏ ⵓⵙⵍⴳⵏ ⵓⵟⵟⵓⵏ 26.99 ⵉⵣⴷⵉⵏ ⴷ ⵜⵓⴳⵔⵉⵡⵜ ⵏ ⵜⵙⵏⴱⴹⴰⵢⵉⵏ ⵜⵉⵥⵕⴼⴰⵏⵉⵏ, ⴷ ⵓⵙⵉⴼⴹ ⵏⵏⵙ ⵉ ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ. ⴰⵔ ⵉⴼⵙⵙⵔ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵉⵙⵉⴹⵏⵏ ⵜⴰⵏⴰⴹⵜ ⴰⴷ. ⵉⵥⴹⴰⵕ ⴰⴷ ⵢⵉⵍⵉ ⵡⴰⴳⴰⵎ ⵏ ⵜⴰⵏⴰⴹⵜ ⵜⴰⵙⴳⵯⵙⴰⵏⵜ ⵏ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵉⵙⵉⴹⵏⵏ ⵏ ⵓⵙⴳⴳⵯⴰⵙ ⵏ 2023-2024 ⴳ ⵡⴰⵙⵉⵜ ⴰⵎⴰⴷⴷⵓⴷ ⵏ ⵜⵏⴼⵍⵓⵙⵜ ⵜⴰⵎⴰⵜⴰⵢⵜ ⵏ ⵜⵏⴱⴰⴹⵜ ⴳ  ⵓⵣⴷⴰⵢ ⴷⴷⵖ..ⵖⵉⴽⵍⵍⵉ ⵉⵥⴹⴰⵕ ⴰⴷ ⵢⵉⵍⵉ ⵡⴰⴳⴰⵎ ⵏ ⵜⴳⴹⵡⵉⵜ ⵏⵏⵙ ⵙ ⵜⵓⵜⵍⴰⵢⵜ ⵜⴰⵄⵕⴰⴱⵜ ⴷ ⵜⴼⵕⴰⵏⵙⵉⵙⵜ.ⵎⴽⴷⴰ ⵔⴰⴷ ⵏⵏ ⴳⵉⵙ ⵜⴰⴼⵎ ⵜⴰⵏⴼⵓⴳⵕⴰⴼⵉⵜ ⵏ ⵉⵏⵎⵎⴰⵍⵏ ⵉⵏⴼⵔⴰⵔⵏ ⵉⵣⴷⵉⵏ ⴷ ⵜⴰⵏⴰⴹⵜ.

ⵜⵙⵏⵓⴱⴳ ⵎⴰⵙⵙⴰ ⵣⵉⵏⴱ ⵍⴰⵄⴰⴷⵡⵉ, ⵜⴰⵏⵙⵙⵉⵅⴼⵜ ⵜⴰⵎⵣⵡⴰⵔⵓⵜ ⵏ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵉⵙⵉⴹⵏⵏ, ⴰⵙⵙ ⵏ ⵓⵙⵉⵏⴰⵙ 10 ⴷⵓⵊⴰⵏⴱⵉⵔ 2024, ⴳ ⵓⵙⵖⵉⵎ ⵏ ⵜⵎⵔⵙⵍⵜ, ⴱⴰⴱ ⵏ ⵜⵎⵎⵓⵖⵔⴰ ⴰⴷⵓⴽⵜⵓⵔ ⵃⵓⵙⴰⵎ ⴱⵏ ⵄⴱⴷ ⵍⵎⵓⵃⵙⵉⵏ ⵍⵄⴰⵏⵇⴰⵔⵉ, ⴰⵏⵙⵙⵉⵅⴼ ⵏ ⵓⴱⵔⵙⵉⵔⴰ ⴰⵎⴰⵜⴰⵢ ⵏ ⵜⵎⵙⵙⵉⴹⵏⵜ ⴳ ⵜⴳⵍⴷⵉⵜ ⵜⴰⵄⵕⴰⴱⵜ ⵜⴰⵙⴰⵄⵓⴷⵉⵜ, ⴳ ⵓⵙⴰⵜⵉ ⵏ ⵓⵔⵣⴰⴼ ⵏ ⵜⵡⵓⵔⵉ ⵉⵡⴰⵜⵜⵙⵏ ⴰⵙⴷⵓⵙ ⵏ ⵓⵎⵢⴰⵡⴰⵙ ⴳ ⵢⵉⴳⵔ ⵏ ⵓⴳⴳⵉⵡⵙ ⵏⴳⵔ ⵙⵉⵏ ⵉⴳⵔⴰⵡⵏ, ⵙ ⵎⴰⴷ ⵉⵎⵎⴰⵍⵏ ⵜⵉⵖⴱⵉ ⵏ ⵉⵣⴷⴰⵢⵏ ⵉⵎⵣⵔⴰⵢⵏ ⵉⴷⵓⵙⵏ ⵏⴳⵔ ⵜⴳⵍⴷⵉⵜ ⵜⴰⵎⵖⵔⴰⴱⵉⵜ ⴷ ⵜⴳⵍⴷⵉⵜ ⵜⴰⵄⵕⴰⴱⵜ ⵜⴰⵙⴰⵄⵓⴷⵉⵜ ⴷ ⵉⴳⵍⴷⴰⵏ ⵏⵏⵙⵏⵜ ⴰⴷ ⵜⵏ ⵉⵙⵙⵏⵔⵓ ⵕⴱⴱⵉ.ⵜⵙⴱⵔⵔⴽ ⵎⴰⵙⵙⴰ ⵜⴰⵏⵙⵙⵉⵅⴼⵜ ⵜⴰⵎⵣⵡⴰⵔⵓⵜ ⵏ ⵓⵙⵇⵇⵉⵎ ⴳ ⵜⵉⵣⵡⵉⵔⵉ ⵏ ⵓⵏⵎⵓⵇⵇⴰⵔ ⴰⴷ, ⵙ ⵎⴰⵙⵙ ⴰⵏⵙⵙⵉⵅⴼ ⵏ ⵓⴱⵔⵙⵉⵔⴰ ⴰⵎⴰⵜⴰⵢ ⵏ ⵜⵎⵙⵙⵉⴹⵏⵜ ⴷ ⵓⴽⴰⴱⴰⵕ ⵍⵍⵉ ⴷⵉⴷⵙ ⵉⵎⵓⵏⵏ, ⴷⴰⵢ ⵜⵙⵏⵄⵜ ⴰⵙⵓⴳⵔ ⵏⵏⵙ ⵉ ⵓⵔⵣⴰⴼ ⴰⴷ, ⴷ ⵓⵙⵓⵜⴳ ⵏⵏⵙ ⵉ ⵜⵔⵎⵉⵜ ⵏ ⵓⴱⵔⵙⵉⵔⴰ ⴰⵎⴰⵜⴰⵢ ⵏ ⵜⵎⵙⵙⵉⴹⵏⵜ ⴷ ⵜⵣⵎⵎⴰⵔ ⵏⵏⵙ ⴳ ⵜⵏⴽⵔⴰ ⵙ ⵜⵡⵓⵔⵉ ⵏ ⵓⴳⴳⵉⵡⵙ. ⵎⴽⴷⴰ ⵜⵙⵙⵎⵏⵉⴷ ⵙ ⵜⵎⵍⴷⴰ ⴰⴷ ⴽⵔⴰ ⵏ ⵉⵙⵙⵉⵙⴼⵉⵡⵏ ⵅⴼ ⵜⵙⵎⵉⴳⴰⵍ ⵏ ⵓⵙⵇⵇⵉⵎ, ⴷ ⵓⵙⵎⴰⴷ ⵏⴳⵔ ⵜⵙⵖⴰⵏ ⵏⵏⵙ ⵜⵉⵏⵣⵔⴰⴼⵉⵏ ⴷ ⵜⴰⵔⵏⵣⵔⴰⴼⵉⵏ ⵉⵙⵎⵓⵏⴰⵏ ⴰⴳⴳⵉⵡⵙ ⵏ ⵜⵙⴳⵓⵔⵉⵡⵉⵏ ⵏ ⵡⴰⴳⵍⴰ, ⴷⴰⵢ ⵜⵙⵙⵉⵡⵍ ⵅⴼ ⵜⵉⵍⴰⵍⵜ ⵜⴰⵏⴼⵔⴰⵔⵜ ⵏ ⵓⴷⵔⴰⵡ ⴰⵙⵉⵏⵔⴰⵏ ⵏⴳⵔ ⵙⵉⵏ ⵉⴳⵔⴰⵡⵏ ⴳ ⵓⵎⵏⵉⴷ ⵏⵏⵙ ⴰⵙⵜⵔⴰⵜⵉⵊⵉ ⵜⴰⴼⴰ ⴰⴷ ⵢⵉⵍⵉ ⵓⵎⵢⴰⵡⴰⵙ ⴳ ⵓⵙⵡⵉⵔ ⴰⵙⴳⴰⵡⴰⵏ ⴷ ⵓⴳⵔⴰⵖⵍⴰⵏ.ⵙⴳ ⵜⵏⵉⵍⴰ ⵏⵏⵙ, ⵢⵓⵍⵖ ⴱⴰⴱ ⵏ ⵜⵎⵎⵓⵖⵔⴰ ⴰⵏⵙⵙⵉⵅⴼ ⵏ ⵓⴱⵔⵙⵉⵔⴰ ⴰⵎⴰⵜⴰⵢ ⵏ ⵜⵎⵙⵙⵉⴹⵏⵜ ⵜⵉⵍⴰⵍⵜ ⵜⴰⵎⵣⵡⴰⵔⵜ ⵉⵍⵍⴰⵏ ⵖⵔ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵉⵙⵉⴹⵏⵏ ⴳ ⵜⴳⵍⴷⵉⵜ ⵏ ⵍⵎⵖⵔⵉⴱ, ⴰⵀⴰ ⵉⵎⵍⴰ ⵜⵉⵔⴰⵜ ⵏⵏⵙ ⴳ ⵓⵙⴷⵓⵙ ⵏ ⵓⴷⵔⴰⵡ ⵏⴳⵔ ⵙⵏⴰⵜ ⵏ ⵜⵎⵔⵙⴰⵍ, ⵍⵓⵎⵎⵏ ⴳ ⵉⴳⵔⴰⵏ ⵏ ⵓⵎⵓⵜⵜⵉ ⴰⵎⵓⵟⵟⵓⵏ, ⴷ ⵓⵙⴰⵏⵓⵏ ⴷ ⵓⵎⵎⵙⴽⴰⵍ ⴰⵡⵙⵙⴰⵏ ⴷ ⵓⵜⵉⵇⵏⵉ, ⵙ ⵎⴰ ⵉⵜⵜⴰⵡⵙⵏ ⴳ ⵓⵙⴱⵓⵖⵍⵓ ⵏ ⵜⵣⵎⵎⴰⵔ ⵜⵉⵎⵔⵙⴰⵍⵉⵏ ⴷ ⵓⵙⴷⵓⵙ ⵏ ⵜⵡⵓⵔⵉ ⵏ ⵓⴳⴳⵉⵡⵙ.ⵉⴳⴰ ⵓⵏⵎⵓⵇⵇⴰⵔ ⴰⴷ ⵢⴰⵜ ⵜⵎⵍⴷⴰ ⵏ ⵓⵎⴹⴰⴽⴰⵕ ⵅⴼ ⵜⵓⴳⵜⵜ ⵏ ⵉⵎⵔⵙⵉⵜⵏ ⵉⵍⴰⵏ ⵢⴰⵏ ⵓⴽⴰⵎⴷ ⵉⵙⵙⵓⵔⵏ, ⴷ ⵓⵔⵣⵣⵓ ⵏ ⵉⴱⵔⴷⴰⵏ ⵏ ⵓⵙⵕⵚⵚⴰ ⵏ ⵉⵎⵢⴰⵙⵙⴰⵜⵏ ⵉⴱⵓⵖⵍⴰⵏ ⴷ ⵓⵙⴷⵓⵙ ⵏⵏⵙⵏ ⴷ ⵜⵙⵓⵍⵜ ⵏⵏⵙⵏ, ⴷ ⵜⵙⵉⵍⴰⵡⵜ ⵏⵏⵙⵏ ⴳ ⵓⵙⴰⵜⵉ ⵏ ⵢⴰⵜ ⵜⵎⵙⵙⴽⵜⵉⵜ ⵏ ⵓⵏⵔⴰⵎⴰⵙ ⴳ ⵎⴰⴷ ⵉⵙⵔⵓⵙⵏ ⵉⵡⵜⵜⴰⵙⵏ ⵏ ⵉⴳⵔⴰⵡⵏ ⵙ ⵙⵉⵏ.ⵉⵇⵇⴰⵏ ⴷ ⵓⴱⴷⴰⵔ ⵉⵙ ⵉⴳⴰ ⵓⴱⵔⵙⵉⵔⴰ ⴰⵎⴰⵜⴰⵢ ⵏ ⵜⵎⵙⵙⵉⴹⵏⵜ ⴳ ⵜⴳⵍⴷⵉⵜ ⵜⴰⵄⵕⴰⴱⵜ ⵜⴰⵙⴰⵄⵓⴷⵉⵜ ⵢⴰⵏ ⵓⵎⵙⴽⴰⵔ ⴰⴷⵙⵍⴰⵏ ⴳ ⵓⵙⵡⵉⵔ ⴰⵙⴳⴰⵡⴰⵏ ⴷ ⵓⴳⵔⴰⵖⵍⴰⵏ, ⵍⵍⵉⴳ ⵢⵓⵎⵥ ⵓⵏⵙⵙⵉⵅⴼ ⵏ ⵓⴱⵔⵙⵉⵔⴰ ⵜⴰⵏⵙⵙⵉⵅⴼⵜ ⵏ ⵜⵎⴰⴷⴷⴰⵙⵜ ⵜⴰⵄⵕⴰⴱⵜ ⵏ ⵉⴳⵔⴰⵡⵏ ⵢⴰⵜⵜⵓⵢⵏ ⵏ ⵓⴳⴳⵉⵡⵙ ⴰⵥⵕⴼⴰⵏ ⴰⵎⴰⵜⴰⵢ ⴷ ⵜⵎⵙⵙⵉⴹⵏⵜ (ⴰⵕⴰⴱⵓⵙⴰⵢ), ⴷ ⵜⵔⵙⵓⵜ ⵏ ⵓⵎⴰⵔⵉ ⵡⵉⵙ ⵙⵉⵏ ⵏ ⵓⵏⵙⵙⵉⵅⴼ ⵏ ⵜⵎⴰⴷⴷⴰⵙⵜ ⵜⴰⴳⵔⴰⵖⵍⴰⵏⵜ ⵏ ⵉⴳⵔⴰⵡⵏ ⵢⴰⵜⵜⵓⵢⵏ ⵏ ⵓⴳⴳⵉⵡⵙ ⴰⵥⵕⴼⴰⵏ ⴰⵎⴰⵜⴰⵢ ⴷ ⵜⵎⵙⵙⵉⴹⵏⵜ (ⵉⵏⵜⵓⵙⴰⵢ).

ⴳ ⵡⴰⵙⵙ ⵏ ⵓⴽⵕⴰⵙ 04 ⴷⵓⵊⴰⵏⴱⵉⵔ 2024 ⴳ ⵜⵎⴰⵥⵓⵏⵜ ⵜⴰⵍⵉⴱⵉⵜ ⵟⴰⵕⴰⴱⵍⵓⵙ, ⵉⵜⵜⴰⵡⵙⵜⴰⵢ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵉⵙⵉⴹⵏⵏ ⵜⴰⴼⴰ ⴰⴷ ⵉⵙⴽⵔ ⵜⵉⵙⵎⵉⴳⴰⵍ ⵏ ⵜⵏⴼⵍⵓⵙⵜ ⵜⴰⵎⴰⵜⴰⵢⵜ ⵏ ⵜⵎⴰⴷⴷⴰⵙⵜ ⵜⴰⴼⵔⵉⵇⵉⵜ ⵏ ⵉⴳⵔⴰⵡⵏ ⵢⴰⵜⵜⵓⵢⵏ ⵏ ⵓⴳⴳⵉⵡⵙ ⴰⵥⵕⴼⴰⵏ ⴷ ⵜⵎⵙⵙⵉⴹⵏⵜ - ⴰⴼⵕⵓⵙⴰⵢ, ⴷ ⵓⵙⵏⵓⴱⴳ ⵏ ⵓⵙⵖⵉⵎ ⵏⵏⵙ ⴰⵎⵖⵍⴰⵍ ⴳ ⵜⵎⴰⵥⵓⵏⵜ ⵕⵕⴱⴰⵟ, ⴷⴼⴼⵉⵔ ⵣⵉ ⵎⴰ ⵢⵓⵎⵥ ⵜⵓⴳⵜⵜ ⵏ ⵉⵙⵜⴰⵢⵏ ⴳ ⵓⵙⵜⴰⵢ ⵉⵎⵎⵓⴳⵏ ⴳ ⵜⵡⵓⵔⵉⵡⵉⵏ ⵏ ⵜⵙⵎⵓⵏⵉ ⵜⵉⵙ ⵚⴹⵉⵚⵜ ⴷ ⵎⵔⴰⵡⵜ ⵏ ⵜⵎⵙⵎⵓⵏⵜ ⵜⴰⵎⴰⵜⴰⵢⵜ ⵏ ⵜⵎⴰⴷⴷⴰⵙⵜ, ⵉⵜⵜⵓⵙⵏⵎⴰⵍⴰⵏ ⵏⴳⵔ 02 ⴷ 06 ⴷⵓⵊⴰⵏⴱⵉⵔ 2024, ⵏⵏⴰ ⴳ ⵉⴷⵔⴰ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵉⵙⵉⴹⵏⵏ ⵙ ⵢⴰⵏ ⵓⴽⴰⴱⴰⵕ ⴰⵏⴼⵔⴰⵔ ⵏⵏⴰ ⵜⵙⵙⵉⵅⵉⴼ ⵎⴰⵙⵙⴰ ⵣⵉⵏⴱ ⵍⵄⴰⴷⴰⵡⵉ ⵜⴰⵏⵙⵙⵉⵅⴼⵜ ⵜⴰⵎⵣⵡⴰⵔⵓⵜ ⵏ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵉⵙⵉⴹⵏⵏ.ⵢⵓⵙⴰ ⴷ ⵓⵙⵜⴰⵢ ⴰⴷ ⵉⵜⵜⴰⵡⵙⵜⴰⵀⵍⵍⴰⵏ ⵜⴰⴼⴰ ⴰⴷ ⵉⵙⴷⴷⵉⴷ ⵜⵓⵙⵏⵜ ⵏ ⵉⴳⵔⴰⵡⵏ ⵢⴰⵜⵜⵓⵢⵏ ⵏ ⵓⴳⴳⵉⵡⵙ ⴳ ⵜⵎⴰⴷⴷⴰⵙⵜ, ⵙ ⵜⵉⵍⴰⵍⵜ ⵏⵏⴰ ⵉⵙⴽⴰⵔ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵉⵙⵉⴹⵏⵏ ⴳ ⵜⵏⴽⵔⴰ ⵙ ⵓⴳⴳⵉⵡⵙ ⵏ ⵓⵥⵕⴼ ⴰⴳⴷⵓⴷⴰⵏ ⴷ ⵓⵙⴷⵓⵙ ⵏ ⵓⵎⵢⴰⵡⴰⵙ ⴳ ⵢⵉⴳⵔ ⴰⴷ ⴳ ⵓⵙⵡⵉⵔ ⴰⵎⵏⵥⴰⵡ, ⴰⵡⴷ ⵙ ⵓⵙⵖⵓⵏ ⵏ ⵍⵎⵖⵔⵉⴱ ⵙ ⵡⴰⵏⵏⴰⵍ ⵏ ⵜⵡⵓⵔⵉ ⵜⴰⴼⵔⵉⵇⵉⵜ ⵉⵙⵙⵓⵔⵏ ⴳ ⵢⵉⴳⵔ ⵏ ⵓⴳⴳⵉⵡⵙ ⴰⵥⵕⴼⴰⵏ, ⴷ ⵓⴱⵣⴰⵔ ⴳ ⵜⵓⵚⴽⴰ ⵏ ⵜⵎⵔⵙⴰⵍ ⵉⴷⵓⵙⵏ, ⵉⵙⴷⵓⵙⵏ ⵜⵉⵙⵓⵙⵖⵜ ⴷ ⵜⵏⵏⵓⴱⴹⴰ ⵉⵀⵢⵢⴰⵏ ⴳ ⵓⵙⵡⵉⵔ ⵏ ⵜⵎⵏⵥⴰⵡⵜ ⵜⴰⴼⵔⵉⵇⵉⵜ.ⵎⴽⴷⴰ ⵉⵙⵏⵄⴰⵜ ⵓⵙⵜⴰⵢ ⴰⴷ ⴰⴷⵖⴰⵔ ⵉⵖⵓⴷⴰⵏ ⵉⵣⵡⴰⵔⵏ ⵉⵍⵍⴰⵏ ⵖⵔ ⵜⴳⵍⴷⵉⵜ ⵏ ⵍⵎⵖⵔⵉⴱ ⴳ ⵓⵏⵎⵉⵍⴰ ⵏⵏⵙ ⴰⴼⵔⵉⵇⵉ ⴷ ⵓⴳⵔⴰⵖⵍⴰⵏ, ⴷ ⴰⵔ ⵉⵎⵎⴰⵍ ⴰⵙⵖⵓⵏ ⵏⵏⵙ ⵙ ⵓⵙⴷⵓⵙ ⵏ ⵓⵎⵢⴰⵡⴰⵙ ⵉⵙⵎⴷⵏ ⴳ ⵓⵎⵏⵉⴷ ⵏⵏⵙ ⵉⴼⴼⵓⵙ - ⵉⴼⴼⵓⵙ, ⵙ ⵓⵎⵙⴰⵙⴰ ⴷ ⵜⴰⵏⵏⴰⵢⵜ ⵜⴰⴳⵍⴷⴰⵏⵜ ⵜⵓⵏⵥⵉⵥⵜ ⴷ ⵜⵎⵓⵖⵍⵉ ⵉⵎⵓⵔⵙⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙ ⵚⴹⵉⵚ ⴰⴷ ⵜ ⵉⵙⵙⵏⵔⵓ ⵕⴱⴱⵉ ⵢⴰⵡⵙ ⴰⵙ, ⵏⵏⴰ ⵉⵜⵜⴳⴳⴰⵏ ⴰⵎⵢⴰⵡⴰⵙ ⴰⴼⵔⵉⵇⵉ, ⴳ ⵇⴰⵃ ⵉⴳⵔⴰⵏ, ⴳ ⵓⵎⵣⵡⴰⵔⵓ ⵏ ⵉⵙⵉⵣⵡⵔⵏ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ.ⵉⵇⵇⴰⵏ ⴷ ⵓⴱⴷⴰⵔ ⵉⵙ ⵜⵙⵎⵓⵏⴰ ⵜⵎⴰⴷⴷⴰⵙⵜ ⵏ ⴰⴼⵕⵓⵙⴰⵢ ⴳ ⵜⴳⵎⴰⵎⵜ ⵏⵏⵙ ⵉⴳⵔⴰⵡⵏ ⵢⴰⵜⵜⵓⵢⵏ ⵏ ⵓⴳⴳⵉⵡⵙ ⴳ ⵙⵉⵏ ⵡⴰⴳⵏⴰⵔⵏ ⴷ ⴽⴽⵓⵥ ⴷ ⵎⵔⴰⵡ ⵏ ⵉⵡⴰⵏⴽⵏ ⵉⴼⵔⵉⵇⵉⵢⵏ, ⴰⵡⴷ ⵜⴰⵙⵏⴱⴹⴰⵢⵜ ⵏ ⵉⵙⵉⴹⵏⵏ ⵏ ⵜⴳⵔⵓⵎⵎⴰ ⵜⴰⴷⵎⵙⴰⵏⵜ ⵏ ⵉⵡⴰⵏⴽⵏ ⵏ ⵓⴷⴰⵔⴰⵎ ⵏ ⵡⴰⴼⵔⵉⵇⵢⴰ, ⴷ ⴰⵔ ⵜⵙⵏⵎⴰⵍⴰ ⵜⵎⵙⵎⵓⵏⵜ ⵏⵏⵙ ⵜⴰⵙⴳⵯⵙⴰⵏⵜ ⴳ ⴽⵓ ⴽⵕⴰⴹ ⵏ ⵉⵙⴳⴳⵯⴰⵙⵏ ⵜⴰⴼⴰ ⴰⴷ ⵢⵉⵍⵉ ⵓⵙⵖⵣⵏ ⵏ ⵜⴰⵏⴰⴹⵉⵏ ⵏ ⵜⵡⵓⵔⵉ ⵏⵏⵙ ⴳ ⵓⵙⴳⴳⵯⴰⵙ ⵉⵣⵔⵉⵏ ⴷ ⵓⵙⵎⴰⵢⵏⵓ ⵏ ⵉⵥⴹⵡⴰⵏ ⵏⵏⵙ ⵏ ⵓⵙⵡⵓⴷⴷⵓ ⴳ ⴽⵕⴰⴹ ⵏ ⵉⵙⴳⴳⵯⴰⵙⵏ.

ⵜⵙⵙⵉⵅⴼ ⵎⴰⵙⵙⴰ ⵣⵉⵏⴱ ⵍⵄⴰⴷⴰⵡⵉ, ⵜⴰⵏⵙⵙⵉⵅⴼⵜ ⵜⴰⵎⵣⵡⴰⵔⵓⵜ ⵏ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵉⵙⵉⴹⵏⵏ ⴳ ⵜⴳⵍⴷⵉⵜ ⵏ ⵍⵎⵖⵔⵉⴱ, ⴰⴽⴰⴱⴰⵕ ⵏⵏⴰ ⵉⴷⵔⴰⵏ ⴳ ⵜⵡⵓⵔⵉⵡⵉⵏ ⵏ ⵜⵙⵎⵓⵏⵉ ⵜⵉⵙ ⴽⵕⴰⴹ ⵡⴰⴳⵏⴰⵔⵏ ⴷ ⵜⴰⵎⵜ ⵏ ⵓⵙⵇⵇⵉⵎ ⴰⵎⵣⵣⴳⴰⵔ ⵏ ⵜⵎⴰⴷⴷⴰⵙⵜ ⵜⴰⵄⵕⴰⴱⵜ ⵏ ⵉⴳⵔⴰⵡⵏ ⵉⵎⴰⵜⵜⴰⵢⵏ ⵏ ⵓⴳⴳⵉⵡⵙ ⴰⵥⵕⴼⴰⵏ ⴷ ⵜⵎⵙⵙⵉⴹⵏⵜ (ⴰⵕⴰⴱⵓⵙⴰⵢ), ⵏⵏⴰ ⵉⵙⵏⵓⴱⴳ ⵓⴱⵔⵙⵉⵔⴰ ⴰⵎⴰⵜⴰⵢ ⵏ ⵜⵎⵙⵙⵉⴹⵏⵜ ⴳ ⵜⴳⵍⴷⵉⵜ ⵜⴰⵄⵕⴰⴱⵜ ⵜⴰⵙⴰⵄⵓⴷⵉⵜ, ⴳ ⵕⵕⵉⵢⴰⴹ, ⴳ ⵡⴰⵙⵙ ⵏ 27 ⴷ 28 ⵏⵓⵡⴰⵏⴱⵉⵔ 2024, ⵙ ⵜⴷⵔⴰⵡⵜ ⵏ ⵉⵏⵙⵙⵉⵅⴼⵏ ⵏ ⵉⴳⵔⴰⵡⵏ ⴰⵄⵕⴰⴱⵏ ⵢⴰⵜⵜⵓⵢⵏ ⵏ ⵓⴳⴳⵉⵡⵙ ⴰⵥⵕⴼⴰⵏ ⴷ ⵜⵎⵙⵙⵉⴹⵏⵜ.ⵜⴻⵜⵜⴰⵡⵥⵍⴰⵢ ⵜⵙⵎⵓⵏⵉ ⴰⴷ ⵙ ⵓⴼⵙⴰⵔ ⴷ ⵓⵎⴹⴰⴽⴰⵕ ⵅⴼ ⵜⵣⵣⵉⴳⵣⵜ ⵏ ⵜⵙⴽⵔⴰⵡⵜ ⵏ ⵉⵎⵓⵙⵙⵓⵜⵏ ⴷ ⵉⵙⵏⵜⴰⵢ ⵏⵏⴰ ⵜⵣⵣⴳⴰⵔ ⵜⵎⴰⴷⴷⴰⵙⵜ ⵜⴰⴼⴰ ⴰⴷ ⵉⵅⴰⵜⵔ ⵓⵎⵢⴰⵡⴰⵙ ⴷ ⵓⵣⴷⴷⵓⵢ ⵏⴳⵔ ⵉⴳⵔⴰⵡⵏ ⵏ ⵓⴳⴳⵉⵡⵙ ⴳ ⵉⵡⴰⵏⴽⵏ ⴰⵄⵕⴰⴱⵏ, ⴷ ⵜⵓⵚⴽⴰ ⵏ ⵜⵣⵎⵎⴰⵔ ⵏⵏⵙⵏ ⵉ ⵓⵙⵖⵓⴷⵓ ⵏ ⵜⵕⵡⵉ ⵏ ⵓⴳⴳⵉⵡⵙ ⴷ ⵜⵎⴰⵎⴽⵉⵏ ⵏ ⵜⵎⵙⵙⵓⴳⵓⵔⵜ ⵊⴰⵊ ⵏ ⵉⴳⵔⴰⵡⵏ ⵉⴳⵎⴰⵎⵏ.ⵎⴽⴷⴰ ⵖⵔⴰⵏ ⵉⴳⵎⴰⵎⵏ ⵏ ⵓⵙⵇⵇⵉⵎ ⵜⵓⴳⵜⵜ ⵏ ⵉⵎⵏⵏⵉⵜⵏ ⵉⵜⵜⴰⵡⵙⵔⴰⵙⵏ ⴳ ⵓⵖⴰⵡⴰⵙ ⵏ ⵜⵡⵓⵔⵉⵡⵉⵏ ⵏ ⵜⵙⵎⵓⵏⵉ, ⴰⵎ ⵓⴼⵙⴰⵔ ⴷ ⵓⵎⴹⴰⴽⴰⵕ ⵏ ⵜⴰⵏⴰⴹⵉⵏ ⵏⵏⴰ ⵜⵙⵙⵓⵊⴷ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵎⵣⵣⴳⴰⵔ ⴷ ⵜⵏⴼⵍⵓⵙⵜ ⵜⴰⵎⴰⵜⴰⵢⵜ, ⴷ ⵓⵣⵣⵔⴰⵢ ⵏ ⵜⴰⵏⴰⴹⵉⵏ ⵏ ⵜⵙⵎⵓⵏⴰⵢ ⵏⵏⵙⵏ ⵜⵉⵣⵎⵣⴰⵏⵉⵏ ⵜⴰⴼⴰ ⴰⴷ ⵢⵉⵍⵉ ⵓⴹⴼⴰⵕ ⵏ ⵓⵎⵓⵙⵙⵓ ⵏ ⵜⵎⴰⴷⴷⴰⵙⵜ, ⴷ ⵜⵙⵖⵣⵏⵜ ⵏ ⵜⴰⵏⴰⴹⵉⵏ ⵏ ⵜⵙⵇⵇⵉⵎⵉⵏ ⵏⵏⵙⵏ ⵜⵉⴷⵙⵍⴰⵏⵉⵏ ⴷ ⵜⴰⵢⵢⴰⵡⵉⵏ, ⵏⵏⴰ ⵉⵜⵜⴽⴰⵎⴰⴷⵏ ⵙ ⵜⴳⵎⵉ ⵏ ⵜⵣⵎⵎⴰⵔ ⵜⵉⵎⵔⵙⴰⵍⵉⵏ ⴷ ⵉⵙⴱⴷⴰⴷⵏ ⵉⵣⵣⵓⵍⴰⵏⵏ ⴷ ⵡⵉⵏ ⵜⵉⴹⴰⴼ ⴷ ⵓⴳⴳⵉⵡⵙ ⵏ ⵉⵡⵜⵜⴰⵙⵏ ⵏ ⵜⴳⵎⵉ ⵜⴰⵙⵓⵍⴰⵏⵜ ⴷ ⵜⴰⵜⵉⴽⵏⵓⵍⵓⵊⵉⵜ ⵏ ⵡⵓⵎⵍⴰⵏ. ⵎⴽⴷⴰ ⵜⴻⵜⵜⴰⵡⵥⵍⴰⵢ ⵜⵙⵎⵓⵏⵉ ⵙ ⵜⵙⵖⵣⵏⵜ ⵏ ⵓⵎⵉⴹⴰⵏ ⴰⴳⵉⵔⴰⵏ ⵏ ⵜⵎⴰⴷⴷⴰⵙⵜ ⴳ ⵓⵙⴳⴳⵯⴰⵙ ⵏ 2024 ⴷ ⵉⵖⴰⵡⴰⵙⵏ ⵏ ⵜⵡⵓⵔⵉ ⵏ ⵜⵙⵇⵇⵉⵎⵉⵏ ⴳ ⵓⵙⴳⴳⵯⴰⵙ ⵏ 2025 ⴷ ⵓⵙⵎⵙⴰⵙⴰ ⵉⵎⵉⵍⵖ ⵏ ⵓⵙⴳⴳⵯⴰⵙ ⴰⴷ ⵏⵉⵜ.ⵉⵇⵇⴰⵏ ⴷ ⵓⴱⴷⴰⵔ ⵉⵙ ⵉⵜⵜⵡⴰⵍⴰ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵉⵙⵉⴹⵏⵏ ⵙⴳ ⵓⵙⴳⴳⵯⴰⵙ ⵏ 2022, ⵜⴰⵏⵙⵙⵉⵅⴼⵜ ⵏ ⵜⵙⵇⵇⵉⵎⵜ ⵏ ⵓⴳⴳⵉⵡⵙ ⵏ ⵉⵡⵜⵜⴰⵙⵏ ⵏ ⵜⴳⵎⵉ ⵜⴰⵙⵓⵍⴰⵏⵜ, ⵉⴹⴼⴰⵕⵏ ⵉ ⵜⵎⴰⴷⴷⴰⵙⵜ ⵜⴰⵄⵕⴰⴱⵜ ⵏ ⵉⴳⵔⴰⵡⵏ ⵢⴰⵜⵜⵓⵢⵏ ⵏ ⵓⴳⴳⵉⵡⵙ ⴰⵥⵕⴼⴰⵏ ⴷ ⵜⵎⵙⵙⵉⴹⵏⵜ, ⵙ ⵓⵎⵙⴰⵙⴰ ⴷ ⵜⵖⵜⴰⵙⵜ ⵏ ⵜⵎⵙⵎⵓⵏⵜ ⵜⴰⵎⴰⵜⴰⵢⵜ ⵏ ⵜⵎⴰⴷⴷⴰⵙⵜ ⴳ ⵜⵙⵎⵓⵏⵉ ⵏⵏⵙ ⵜⵉⵙ ⴽⴽⵓⵥⵜ ⴷ ⵎⵔⴰⵡⵜ ⵉⵜⵜⵓⵙⵏⵎⴰⵍⴰⵏ ⴳ ⵊⴰⴷⴷⴰ ⴳ ⴽⵟⵓⴱⵕ 2022.

ⵜⴷⵔⴰ ⵎⴰⵙⵙⴰ ⵜⴰⵏⵙⵙⵉⵅⴼⵜ ⵜⴰⵎⵣⵡⴰⵔⵓⵜ ⵏ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵉⵙⵉⴹⵏⵏ, ⵍⵍⵉⴳ ⵜⴳⴰ ⵜⴰⵏⴼⵍⵓⵙⵜ ⵜⴰⵎⴰⵜⴰⵢⵜ ⵏ ⵜⵎⴰⴷⴷⴰⵙⵜ ⵜⴰⴳⵔⴰⵖⵍⴰⵏⵜ ⵏ ⵉⴳⵔⴰⵡⵏ ⵢⴰⵜⵜⵓⵢⵏ ⵏ ⵓⴳⴳⵉⵡⵙ ⴰⵥⵕⴼⴰⵏ ⵉⵍⴰⵏ ⵜⵉⵥⵍⴰⵢⵉⵏ ⵜⵉⵏⵣⵔⴰⴼⵉⵏ (ⵊⵓⵔⵉⵙⴰⵢ), ⴳ ⵜⵡⵓⵔⵉⵡⵉⵏ ⵏ ⵜⵙⵎⵓⵏⵉ ⵏ ⵓⵙⵇⵇⵉⵎ ⴰⵎⵣⵣⴳⴰⵔ ⵏ ⵉⵏⵜⵓⵙⴰⵢ, ⵉⵜⵜⵓⵙⵏⵎⴰⵍⴰⵏ ⴳ ⵜⵎⴷⵉⵏⵜ ⵏ ⵍⵇⴰⵀⵉⵔⴰ, ⴰⵙⵙ ⵏ 28 ⴽⵟⵓⴱⵕ 2024.ⴳ ⵜⴳⵓⵔⵉ ⵏⵏⵙ ⴳ ⵎⴰⴷ ⵉⵥⵍⵉⵏ ⵙ ⵓⵎⵏⵏⵉ ⵉⵜⵜⴰⵡⵙⵔⴰⵙⵏ ⴳ ⵓⵖⴰⵡⴰⵙ ⵏ ⵜⵡⵓⵔⵉⵡⵉⵏ ⵉⵥⵍⵉⵏ ⵙ ⵊⵓⵔⵉⵙⴰⵢ, ⵜⵙⵙⴽⵜⵉ ⴷ ⵎⴰⵙⵙⴰ ⵜⴰⵏⵙⵙⵉⵅⴼⵜ ⵜⴰⵎⵣⵡⴰⵔⵓⵜ ⵙ ⵉⵡⵜⵜⴰⵙⵏ ⵉⴷⵙⵍⴰⵏⵏ ⵏ ⵜⵎⴰⴷⴷⴰⵙⵜ, ⵏⵏⴰ ⵉⴳⴰⵏ ⴰⵙⵉⵍⵉ ⵏ ⵓⵙⴰⵜⵉ ⵏ ⵓⵎⵢⴰⵡⴰⵙ ⴰⵎⵔⵙⴰⵍ ⵏ ⵓⵙⴳⵔⴰⵡ ⵏ ⵉⴳⵔⴰⵡⵏ ⵢⴰⵜⵜⵓⵢⵏ ⵏ ⵓⴳⴳⵉⵡⵙ ⵉⵍⴰⵏ ⵜⵉⵥⵍⴰⵢⵉⵏ ⵜⵉⵏⵣⵔⴰⴼⵉⵏ, ⵙ ⵎⴰⴷ ⵉⵙⴽⴰⵔⵏ ⵜⴰⵏⴰⴼⵓⵜ ⵉ ⵉⴳⵔⴰⵡⵏ ⴰⴷ, ⴷ ⴰⵔ ⵉⴱⵣⵣⵔ ⴳ ⵓⵙⵔⵓⵙ ⵏ ⵉⵡⵜⵜⴰⵙⵏ ⵉⵎⴰⵜⴰⵢⵏ ⵏ ⵉⵏⵜⵓⵙⴰⵢ.ⴳ ⵓⵙⴰⵜⵉ ⴰⴷ, ⵜⵙⵎⴰⵢⵏⵓ ⵎⴰⵙⵙⴰ ⵜⴰⵏⵙⵙⵉⵅⴼⵜ ⵜⴰⵎⵣⵡⴰⵔⵓⵜ ⴰⵙⴷⴷⵉⴷ ⵏ ⵜⴳⵯⵎⴰⵏⵉⵜ ⵏ ⵊⵓⵔⵉⵙⴰⵢ ⵖⵔ ⵡⴰⵎⵓⵏ ⴰⴳⵔⴰⵖⵍⴰⵏ ⵏ ⵉⵏⵜⵓⵙⴰⵢ, ⵏⵏⴰ ⴱⴰⵀⵔⴰ ⵉⴼⴰⵡⵏ ⴳ ⵓⵏⴳⵔⴰⵡ ⵏⵏⵙ ⴰⴷⵙⵍⴰⵏ ⴷ ⵓⵖⴰⵡⴰⵙ ⵏⵏⵙ ⴰⵙⵜⵔⴰⵜⵉⵊⵉ. ⴷⴰⵢ ⵜⵙⴷⴷⵉⴷ ⵉⵙ ⵜⵉⵏⵥⴰⵕ ⵉⵡⴰⵍⴰⵏ ⵉⵎⵓⵙⵙⵓⵜⵏ ⵉⵏⵣⵔⴰⴼⵏ, ⵓⵔ ⵖⵉⴼⵙ ⵉⵙⵙⴰⵡⴰⵍ ⵊⵓⵔⵉⵙⴰⵢ ⵖⴰⵙ ⴳ ⵓⵙⴰⵜⵉ ⵏ ⵉⵙⵏⵜⴰⵢ ⴷ ⵉⵎⵓⵙⵙⵓⵜⵏ ⵏⵏⴰ ⵖⵔⵙ ⵉⵣⵡⴰⵔ ⵉⵏⵜⵓⵙⴰⵢ ⴳ ⵓⵙⵡⵉⵔ ⵉⵔⵉⵡⵏ, ⴰⵡⴷ ⴳ ⵓⵙⴰⵜⵉ ⵏ ⵓⵎⵢⴰⵡⴰⵙ ⵉⴷⵓⵙⵏ ⴰⴽⴷ ⵉⴳⵔⴰⵡⵏ ⵏⵏⵙ.ⵜⴳⴰ ⵜⴽⵛⵛⵓⵎⵜ ⵏ ⵎⴰⵙⵙⴰ ⵜⴰⵏⵙⵙⵉⵅⴼⵜ ⵜⴰⵎⵣⵡⴰⵔⵓⵜ ⵢⴰⵜ ⵜⵎⵍⴷⴰ ⵏ ⵓⵙⵓⵜⵔ ⵏ ⵡⴰⵏⵏⴰⵍ ⵏ ⵓⵙⵇⵇⵉⵎ ⴰⵎⵣⵣⴳⴰⵔ ⵏ ⵉⵏⵜⵓⵙⴰⵢ, ⵉ ⵊⵓⵔⵉⵙⴰⵢ, ⵍⵍⵉⴳ ⵉⴳⴰ ⵜⴰⵙⴹⴼⵕⵜ ⵏ ⵉⵏⵜⵓⵙⴰⵢ. ⵙ ⵎⴰⴷ ⵉⵙⴷⵓⵙⵏ ⵜⵓⵙⵏⵜ ⵙ ⵡⴰⵜⵉⴳⵏ ⴷ ⵡⵓⵎⵄⵉⵏⵏ ⵏ ⵓⵣⵓⵔⵜ ⴰⵏⵣⵔⴰⴼ, ⴷ ⵓⵙⵉⵍⵉ ⵏ ⵜⵓⵙⵓⵔⵜ ⵏ ⵜⵙⵖⴰⵏ ⵜⵉⵏⵣⵔⴰⴼⵉⵏ, ⴳ ⵓⵙⵎⴰⴷ ⵏⵏⵙⵏⵜ ⴰⴽⴷ ⵜⵙⵖⴰⵏ ⵏ ⵜⵎⵏⵥⵉⵜ ⴷ ⵓⵙⵓⵜⴳ.ⵉⵙⵏⴱⴳⵉ ⵓⵙⵇⵇⵉⵎ ⴰⵎⵣⵣⴳⴰⵔ ⵙ ⵓⵙⵓⵜⵔ ⴰⴷ ⵙ ⵜⵖⴰⵔⴰⵙⵜ ⵏ ⵜⵙⵖⵏⵜ ⵏⵏⵙ ⵙ ⵜⵓⴳⵜⵜ ⵉ ⵢⴰⵜ ⵜⵙⵓⵎⵔⵜ ⵏ ⵓⵙⴳⴳⴷ ⵏ ⵓⵏⴳⵔⴰⵡ ⴰⴷⵙⵍⴰⵏ ⵏ ⵉⵏⵜⵓⵙⴰⵢ, ⴷ ⵓⵢⵏⵏⴰ ⵙ ⵜⵖⴰⵔⴰⵙⵜ ⵏ ⵜⵡⵓⵔⵉⵡⵉⵏ ⵏ ⵓⴳⵔⴰⵡ ⵏⵏⵙ ⴷ ⵢⵓⵙⴰⵏ ⵏⵏⴰ ⵖⴰ ⵉⵜⵜⵓⵙⵏⵎⴰⵍⴰⵏ ⴳ ⵎⵉⵚⵕ ⴳ ⵓⵙⴳⴳⵯⴰⵙ ⵏ 2025.